കേരളത്തിൽ എവിടെയും അവ്‌ക്കാഡോ വളർത്താം; അറിയേണ്ട കാര്യങ്ങൾ

കേരളത്തിൽ വെണ്ണപ്പഴം അഥവാ അവ്‌ക്കാഡോ (Avocado) കൃഷിക്ക് പ്രചാരമേറുന്നു. ഉയർന്ന ആഭ്യന്തര-വിദേശ വിപണിയും മികച്ച വരുമാന സാധ്യതയും ഉള്ളതിനാൽ നാടൻ ഇനങ്ങളേക്കാൾ ഹൈബ്രിഡ് അവ്‌ക്കാഡോ കൃഷിയിലേക്ക് നിരവധി കർഷകരാണ് ഇപ്പോൾ തിരിയുന്നത്.

● കേരളത്തിന് അനുയോജ്യമായ ഇനങ്ങൾ
ലോകത്താകമാനം വെസ്റ്റ് ഇന്ത്യൻ, ഗ്വാട്ടിമാലൻ, മെക്സിക്കൻ എന്നിങ്ങനെ മൂന്ന് പ്രധാന അവ്‌ക്കാഡോ വംശങ്ങളാണുള്ളത്. ഇവ മൂന്നും കേരളത്തിലെ വിവിധ കാലാവസ്ഥകളിൽ കൃഷി ചെയ്യാൻ സാധിക്കും.

- വെസ്റ്റ് ഇന്ത്യൻ ഇനങ്ങൾ: കേരളത്തിലെ ചൂടുകൂടിയ ഇടനാടൻ താഴ്വാര പ്രദേശങ്ങൾക്ക് ഏറ്റവും അനുയോജ്യം.

- ഗ്വാട്ടിമാലൻ, മെക്സിക്കൻ ഇനങ്ങൾ: തണുപ്പേറിയ ഹൈറേഞ്ച് മേഖലകളിൽ (ഇടുക്കി, വയനാട് തുടങ്ങിയവ) മികച്ച വിളവ് നൽകും. വിപണിയിൽ ഏറെ പ്രിയമുള്ള 'ഹാസ്' (Hass) പോലുള്ള ഇനങ്ങൾ ഇതിൽ ഉൾപ്പെടുന്നു.

● കൃഷിയിലെ കേരളത്തിന്റെ മുൻതൂക്കം

ഓരോ ഇനത്തിനും പൂവിടാനും കായ്ക്കാനും വ്യത്യസ്ത സമയങ്ങളാണ് വേണ്ടിവരിക. ഉദാഹരണത്തിന്, 'ഹാസ്' ഇനത്തിന് കായ്കൾ മൂപ്പെത്തി പഴമാകാൻ ഒൻപത് മാസം വേണ്ടിവരുമ്പോൾ 'ട്രോപ്പിക്കോ 34' ഇനത്തിന് അഞ്ച് മാസം മതി. കേരളത്തിലെ വിവിധ ഭാഗങ്ങളിൽ വ്യത്യസ്ത ഇനങ്ങൾ കൃഷി ചെയ്യുന്നതുവഴി വർഷം മുഴുവൻ വിപണിയിൽ വെണ്ണപ്പഴം ലഭ്യമാക്കാൻ കർഷകർക്ക് സാധിക്കും.

● കൃഷി ചെയ്യുമ്പോൾ ശ്രദ്ധിക്കേണ്ടവ
- സ്ഥലം: പരമാവധി സൂര്യപ്രകാശം ലഭിക്കുന്നതും നല്ല നീർവാർച്ചയുള്ളതുമായ സ്ഥലം വേണം നടാനായി തിരഞ്ഞെടുക്കാൻ. വെള്ളക്കെട്ട് പാടില്ല. മണ്ണ് തറഞ്ഞുപോകാനും പാടില്ല.

- കൃഷിരീതി: തടങ്ങൾ ഉയർത്തിയുള്ള (Raised bed) കൃഷിരീതിയാണ് ഏറ്റവും മികച്ചത്. ഇത് മഴക്കാലത്തെ വെള്ളക്കെട്ടിനെ പ്രതിരോധിക്കാൻ സഹായിക്കും.

- മണ്ണ്: മണ്ണിന്റെ അമ്ല-ക്ഷാരനില (pH) 5.5 നും 6.5 നും ഇടയിൽ നിലനിർത്തണം. ഇതിനായി കുമ്മായം, ഡോളോമൈറ്റ് അല്ലെങ്കിൽ ജിപ്സം ചേർക്കാവുന്നതാണ്. നടീൽ സമയത്ത് മണ്ണ് പൂർണ്ണമായും ജൈവസമ്പുഷ്ടമാക്കണം.

കേവലം പഴം വിൽപന മാത്രമല്ല, സൗന്ദര്യവർധക വസ്തുക്കൾ മുതൽ ന്യൂട്രാസ്യൂട്ടിക്കലുകൾ വരെയുള്ള മൂല്യവർധിത ഉൽപന്നങ്ങളുടെ നിർമാണം, കയറ്റുമതി സാധ്യതകൾ, ഫാം ടൂറിസം എന്നിവയും ഈ പുതുതലമുറ വിള കർഷകർക്ക് മുന്നിൽ തുറന്നിടുന്നുണ്ട്.