അറബിക്കടലിൽ ചക്രവാതച്ചുഴി; ബംഗാൾ ഉൾക്കടലിൽ ന്യൂനമർദ്ദം രൂപപ്പെടുന്നു, കേരളത്തിൽ മഴ കനക്കാൻ സാധ്യത

ബംഗാൾ ഉൾക്കടലിൽ ഈ മാസം 13-ഓടെ പുതിയൊരു ന്യൂനമർദ്ദം രൂപപ്പെടാൻ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് (IMD) മുന്നറിയിപ്പ് നൽകുന്നു. നിലവിൽ ഇന്തോ-ചൈന മേഖലയിലുള്ള ചക്രവാതച്ചുഴി (Cyclonic circulation) അടുത്ത 48 മണിക്കൂറിനുള്ളിൽ ആൻഡമാൻ കടലിലൂടെ ബംഗാൾ ഉൾക്കടലിൽ പ്രവേശിക്കുകയും, തുടർന്ന് അത് ശക്തി പ്രാപിച്ച് ന്യൂനമർദ്ദമായി മാറുകയും ചെയ്യുമെന്നാണ് പ്രവചനം. ഈ സിസ്റ്റം ഭാവിയിൽ ചുഴലിക്കാറ്റായി രൂപാന്തരം പ്രാപിക്കാനും സാധ്യതയുണ്ടെന്ന് റിപ്പോർട്ടുകൾ സൂചിപ്പിക്കുന്നു.

ഇതിന് പുറമെ, അറബിക്കടലിലും ലക്ഷദ്വീപിന് സമീപമായി സമുദ്രനിരപ്പിൽ നിന്നും 0.9 കിലോമീറ്റർ ഉയരത്തിൽ മറ്റൊരു ചക്രവാതച്ചുഴിയും രൂപപ്പെട്ടിട്ടുണ്ട്. ഇതുമൂലം തെക്കുകിഴക്കൻ അറബിക്കടലിൽ ശക്തമായ ഇടിയോടും കാറ്റോടും കൂടിയ മഴ തുടരുകയാണ്. ഇതിന്റെ ഫലമായി വടക്കൻ കേരളത്തിൽ ഭാഗികമായി മേഘാവൃതമായ കാലാവസ്ഥ അനുഭവപ്പെടുന്നുണ്ട്. ശ്രീലങ്കയ്ക്ക് സമീപമുള്ള മാന്നാർ കടലിടുക്കിൽ നിന്ന് വടക്കൻ കർണാടക വരെ നീളുന്ന മറ്റൊരു ന്യൂനമർദ്ദ പാത്തിയും നിലനിൽക്കുന്നുണ്ട്.

ഈ കാലാവസ്ഥാ മാറ്റങ്ങളുടെ ഫലമായി വരും ദിവസങ്ങളിൽ കേരളത്തിലും തമിഴ്നാട്ടിലും ഇടിമിന്നലോടു കൂടിയ ശക്തമായ മഴയ്ക്ക് സാധ്യതയുണ്ട്. പുതിയ ന്യൂനമർദ്ദത്തിന്റെ കൂടുതൽ വിശദാംശങ്ങൾ വരും ദിവസങ്ങളിൽ വ്യക്തമാകും. ജനങ്ങൾ കാലാവസ്ഥാ മുന്നറിയിപ്പുകൾ ശ്രദ്ധിക്കുകയും ജാഗ്രത പാലിക്കുകയും ചെയ്യേണ്ടതാണ്.