പരന്തൂർ വിമാനത്താവള പദ്ധതി തമിഴ്‌നാട് ഉപേക്ഷിച്ചു; കർഷക സമരത്തിന് വൻ വിജയം

കർഷകരും നാട്ടുകാരും നടത്തിയ 1000 ദിവസം നീണ്ട ഐതിഹാസിക സമരത്തിനൊടുവിൽ കാഞ്ചീപുരത്തിനടുത്തുള്ള പരന്തൂരിലെ പുതിയ വിമാനത്താവള പദ്ധതി ഉപേക്ഷിച്ച് തമിഴ്‌നാട് സർക്കാർ. പദ്ധതി ഫലഭൂയിഷ്ഠമായ കൃഷിഭൂമിയെയും ജലസ്രോതസ്സുകളെയും ഗ്രാമീണരുടെ ഉപജീവനത്തെയും ദോഷകരമായി ബാധിക്കുമെന്ന് ചൂണ്ടിക്കാട്ടിയാണ് പദ്ധതി ഉപേക്ഷിക്കുന്നതെന്ന് മുഖ്യമന്ത്രി സി. ജോസഫ് വിജയ് നിയമസഭയിൽ പ്രഖ്യാപിച്ചു. ചെന്നൈയ്ക്കായുള്ള രണ്ടാമത്തെ വിമാനത്താവളത്തിനായി ഇനി മറ്റ് സ്ഥലങ്ങൾ കണ്ടെത്തുമെന്നും അദ്ദേഹം കൂട്ടിച്ചേർത്തു.

തുടക്കം 2022-ൽ: പ്രതിവർഷം 10 കോടി യാത്രക്കാരെ ഉൾക്കൊള്ളാൻ ലക്ഷ്യമിട്ട് 27,000 കോടി രൂപ ചിലവിലാണ് മുൻ ഡി.എം.കെ സർക്കാർ 2022-ൽ ഈ പദ്ധതി പ്രഖ്യാപിച്ചത്.

ഏക്കനാപുരത്തെ ചെറുത്തുനിൽപ്പ്: പദ്ധതിക്കായി 13 ഗ്രാമങ്ങളിലായി 5,000 ഏക്കറോളം ഭൂമി ഏറ്റെടുക്കാനായിരുന്നു തീരുമാനം. ഇതിൽ വലിയൊരു ശതമാനം കൃഷിഭൂമിയും ജലസ്രോതസ്സുകളുമായിരുന്നു. കൃഷിഭൂമി നഷ്ടപ്പെടുന്നതോടെ തങ്ങളുടെ ഉപജീവനം ഇല്ലാതാകുമെന്ന് ഭയന്ന ഏക്കനാപുരം ഉൾപ്പെടെയുള്ള ഗ്രാമങ്ങളിലെ കർഷകർ ഒന്നിച്ച് നിന്ന് സമാധാനപരമായി പ്രതിഷേധം ആരംഭിക്കുകയായിരുന്നു.

മുഖ്യമന്ത്രിയുടെ ഇടപെടൽ: മുഖ്യമന്ത്രിയാകുന്നതിന് മുമ്പ് തന്നെ വിജയ് ഈ സമരത്തിന് പിന്തുണ പ്രഖ്യാപിച്ചിരുന്നു. സർക്കാരിന്റെ പുതിയ തീരുമാനത്തോടെ തങ്ങളുടെ ഭൂമിക്കും ജീവനും മേലുണ്ടായിരുന്ന വലിയൊരു ഭീഷണിയാണ് ഒഴിവായതെന്ന ആശ്വാസത്തിലാണ് ഗ്രാമവാസികൾ.

വികസനത്തിന് തിരിച്ചടിയെന്ന് സ്റ്റാലിൻ: അതേസമയം, പുതിയ വിമാനത്താവള പദ്ധതി ഉപേക്ഷിച്ചത് തമിഴ്‌നാടിന്റെ വ്യാവസായിക-സാമ്പത്തിക വളർച്ചയ്ക്ക് വലിയ തിരിച്ചടിയാണെന്ന് മുൻ മുഖ്യമന്ത്രി എം.കെ സ്റ്റാലിൻ പ്രതികരിച്ചു. വിമാനത്താവളത്തിനായി ഇതിനകം 1,700 ഏക്കറോളം സ്വകാര്യ ഭൂമി ഏറ്റെടുക്കുകയും പലർക്കും നഷ്ടപരിഹാരം നൽകുകയും ചെയ്തിട്ടുണ്ടെന്നും അദ്ദേഹം ചൂണ്ടിക്കാട്ടി.